أنا ليية رافضك يا داخلية

حتى الأن مش مقتنع بيكى يا داخلية , أدائك سيىء و فية غلطات تحتسب خيانة عظمى بتحصل

لما الظابط اللى كان بيقتل متظاهرين دلوقتى فى الشارع بيتمسكنلى و عاملى لامؤاخذة سوسن دا مش مكسور دا بيمثل

لما عيل عندة 10 - 12 سنة سايق موتسيكل قدامكم و سايبينة عادى

ولا لما الناس بتسترجع مصانع أو بيدافعو عن منطقتهم و البلطجية الى أقتحموا المستشفى و أنتوا مبتعملوش حاجة

ولا لما قلة تواجدكم خلت بعض الناس تقولك الثورة خربت البلد , خراب مقصود من ناحيتكم , و بتشوهو الثورة بقصد

ولا لما الأقتصاد عمرة ما هيقف على رجلة طول ما الشوارع فى حالة هرجلة " مقصودة " من طرفكم

ولا لما أمن الدولة القذر غيرو أسمة للأمن الوطنى مع الأحفاظ بالقذارة و الألاعيب لاتزال هيا هيا

ولا لما بعض القيادات بالداخلية تأمر الظباط بعدم النزول للشارع

ولا الأمناء الفاسدين اللى بيعملو مظاهرات و بتطبطبوا عليهم حتى لو ولعوا فى حاجتكم و إحنا لما بنعمل مظاهرة بنتدعك و أحكام عسكرية !

ولا القناصة اللى متصورين و لسة متجابوش

وما خفى أعظم

أنتو بتقبضو مرتب ليية ؟ شايفيين أنكم تستحقوه ؟

الحل من وجهة رأييى الشخصية هو

1- بلاش نضحك على بعض و نقول غيرنا شعار الشرطة , أنا مش عايز شعارات أنا عايز أشوف شرطة بتشتغل عايز أشوفهم بيخدموا الشعب اللى المفروض أنوا دورهم اللى بيتدفعلهم مرتبات علشان يحققوة , مرتبات من الضرايب اللى الشعب بيدفعها !

2- الأستاذ وزير الداخلية المصرى الحالى العيسوى لو مش قادر على مهامة كوزير داخلية يستقيل أفضل و ييجى واحد قادر

3- أهالى الشهدا دول يستريحوا شوية لما يتحاكم اللى قتلو ولادهم و بناتهم و يصدر عليهم حكم , مش هنقضيها تأجيلات

4- اللى فى الداخلية و يعرف واحد زميلة عمل تجاوزات قبل و أثناء و بعد الثورة يبلغ عنة فوراً

5- يبدؤا نظام دوريات لتأمين الشوارع

6- يلغوا التحوير اللى بيتم فى الأجراءات

7- التعذيب فى الأقسام لأ و تحت ال لأ دى ميت ألف خط !

8- طلعوا الناس اللى أنتوا معتقلينهم من غير أسباب سواء قبل أو أثناء أو بعد 25 يناير

عزيزتى الشرطة المصرية :- بطلى ش**** !ا

عمر ما الشعب هيرضى عنك يا داخلية غير لما تنضفى من نفسك .. سامعنى يا عيسوى ؟

ماجد صالح .