أوحش ست في العالم ؟

أحب أعرفكم علي Lizzie Velásquez 

وحشة صح ؟

إيه المنظر دا ؟

قبل ما تقول كل دا عارف قصتها ؟

البنت دي " ليزي " إتولدت بمتلازمة مش موجود غير عندها هي و شخص تاني في العالم بس و هي إنها مبتزيدش في الوزن عن 64 باوند اللي هو 29 كيلو و جسمها نسبة الدهون فيه صفر

ليزي مش كدة علشان هي عايزة كدة و حاولت تاكل كتير و مبتتخنش هي ثابتة كدة و بتحتاج تاكل و بيوصل إحتياجها للطاقة في اليوم لحوالي 5,000 سعر حراري مقارنة بالنسبة الطبيعية 3,770 سعر حراري و بتاكل وجبات كتير في اليوم علشان جسمها محتاج دا

ليزي من و هي عندها أربع سنين إبتدت تفقد الرؤية بعينها اليمين و هي حالياً مبتشوفش بيها و العيش الشمال ضعيفة

الدكتور قال لأبوها و أمها البنت دي مش هتعرف تمشي ولا تتكلم ولا تعمل حاجة بنفسها بس أهلها قالوا هنفضل جبنها و بصوا عليها إنهاردة

إنهاردة ليزي عندها 24 سنة و كتبت قصة حياتها في 2010 في كتاب باللغتين الإنجليزية و الأسبانية و في 2012 كتبت كتابها التاني بعنوان Be Beautiful, Be You - كن جميلاً, كن أنت اللي بيشجع الناس إن الشكل مش مهم المهم تحب نفسك

ليزي اللي الدكتور قال عليها "مش هتعرف تمشي ولا تتكلم ولا تعمل حاجة بنفسها " إنهاردة بتطلع ندوات و مؤتمرات و تتكلم عن قصتها و إزاي بتواجه عالم كله شايفها وحشة و ليها جهود في مواجهة البلطجة " Bulling " 

الإنسانة دي من أجمل البشر فعلاً بس لازم تسمعها الأول -> http://www.youtube.com/watch?v=c62Aqdlzvqk

مصادر:

http://www.youtube.com/watch?v=c62Aqdlzvqk
http://en.wikipedia.org/wiki/Lizzie_Vel%C3%A1squez 

الثمرة السحرية

الإسم العلمي هو Synsepalum dulcificum و الإسم المتداول هو Miracle Berries و هو نبات بينتج ثمرة صغيرة كدة و النبات موجود في الأصل في غرب أفريقيا و كانت بتستخدم لتحويل طعم الأكل للأحسن ,,, إزاي ؟

الثمرة دي بتحتوي علي بروتين إسمه miraculin البروتين دا لما بيلمس براعم التذوق في اللسان بيخلي أي حاجة حامضية طعمها مسكر و الـMiracle Berriesملهاش طعم مميز بس أي حاجة حامضة بعدها بتبقي مسكرة,تخيل تاكل ليمونة تلاقيها مسكرة جدا أو تشرب خل تلاقي طعمه حلو بس الـ Miracle Berries مش هتغير من اللي إنت بتاكله فلو قعدت تاكل ليمون كتير مثلاً بطنك هتوجعك و الـ Miracle Berries ممكن تستخدم مع مرضي السكر و مع مرضي السرطان اللي الكيماوي قلل حاسة التذوق عندهم و في الدايت و التخسيس

المصادر

http://www.youtube.com/watch?v=XWVzL5AzkF4

http://en.wikipedia.org/wiki/Synsepalum_dulcificum

http://www.nytimes.com/2008/05/28/dining/28flavor.html?_r=1&

لحظة.

و في لحظة ما و علي الرغم من إنك عيشت نفس الموقف قبل كدة بس تحس المرة دي مختلفة كإنها مسحت كل اللي قبلها و كأنها أول مرة و نفسك تبقي أخر مرة

كل لحظة قبلها بتتضائل إن لم تختفي و لما بتفكر في المستقبل و بعد كل السيناريوهات اللي دماغك بتحطها بتلاقي إن مفيش لحظة هتبقي زي دي برضو

بتقول ما ممكن اللحظة دي ييجي اللي أجمل منها في المستقبل و تقول نفس الكلام دا عنها بس إلا دي مستحيل لأن ليها سحرها الخاص اللي مش هتحسه تاني

اللي هي لحظة هتبقي فاكرها طول عمرك بغض النظر عن نتايجها و عواقبها برضوا هتفتكرها و هتفتكر إحساسك ساعتها و كل ما تفتكر هتبتسم من غير قصد

و مهما حاولت تكره اللحظة دي دا لو قدرت تقتنع إنك لازم تكرهها هتفشل، دي اللحظة الوحيدة في عمرك اللي كنت عايش فيها فعلاً، كأن عمرك كله لحظة..